ഇന്ത്യക്കെതിരെ ചരിത്രത്തിലാദ്യമായി ഒരു ടി20 ക്രിക്കറ്റ് പരമ്പര ജയിച്ചതിന്റെ ആവേശത്തിലാണ് അയര്ലന്ഡ്. ആദ്യമത്സരത്തില് 34 റണ്സിന്റെ ജയത്തിന് പിന്നാലെ രണ്ടാം മത്സരത്തില് ഒരു റണ്ണിന്റെ ജയം. രണ്ടിലും മികച്ച ആധിപത്യത്തോടെയാണ് അയര്ലന്ഡ് മത്സരം വരുതിയിലാക്കിയതും ഇന്ത്യയെ പ്രതിസന്ധിയിലേക്ക് തള്ളിവിട്ടതും. ശ്രേയസ് അയ്യരെന്ന പുതിയ ക്യാപ്റ്റന് കാര്യങ്ങള് അത്ര എളുപ്പമല്ലെന്ന് വ്യക്തം. സഞ്ജു സാംസണ് നിറംമങ്ങിയ മത്സരങ്ങള് താരത്തിന്റെ ഭാവി ചോദ്യചിഹ്നമാക്കുന്നു. മറുവശത്ത് ചരിത്രജയത്തിന്റെ ആഹ്ലാദാരവത്തിലാണ് അയര്ലന്ഡ്.
അയര്ലന്ഡിനെതിരായ രണ്ടാം ട്വന്റി20യില് ഇന്ത്യയുടെ തോല്വി ഞെട്ടിക്കുന്നതാണ്. ബെല്ഫാസ്റ്റില് നടന്ന രണ്ടാം പോരാട്ടത്തില് ഒരു റണ്ണിനാണ് ആതിഥേയര് വിജയിച്ചത്. ഇതോടെ രണ്ടു മത്സരങ്ങളുടെ പരമ്പര 2-0ന് അയര്ലന്ഡ് സ്വന്തമാക്കുകയായിരുന്നു. ട്വന്റി20 ലോകകപ്പ് വിജയിച്ച ശേഷം നടന്ന ആദ്യ പരമ്പരയിലാണ് അയര്ലന്ഡിനോട് ഇന്ത്യ സമ്പൂര്ണ തോല്വി വഴങ്ങിയത്. ശ്രേയസ് അയ്യര് ട്വന്റി20 ക്യാപ്റ്റന്സി ഏറ്റെടുത്ത ശേഷമുള്ള ആദ്യ പരമ്പര കൂടിയാണ് ഇന്ത്യ കൈവിട്ടത് എന്ന നാണക്കേടുമുണ്ട്. രണ്ടാം ട്വന്റി20യില് ആദ്യം ബാറ്റു ചെയ്ത അയര്ലന്ഡ് എട്ടു വിക്കറ്റ് നഷ്ടത്തില് 154 റണ്സെടുത്തു. മറുപടിയില് ഇന്ത്യയ്ക്ക് ഒന്പതു വിക്കറ്റ് നഷ്ടത്തില് 153 റണ്സിലെത്താന് മാത്രമേ സാധിച്ചുള്ളൂ. അര്ധ സെഞ്ചറി നേടിയ മധ്യനിര താരം തിലക് വര്മാണ് മറുപടി ബാറ്റിങ്ങില് ഇന്ത്യയുടെ ടോപ് സ്കോറര്. 46 പന്തുകള് നേരിട്ട തിലക് വര്മ 55 റണ്സെടുത്തു. കഴിഞ്ഞ മത്സരത്തില് തിലക് നിരാശപ്പെടുത്തിയിരുന്നു. എന്നാല് രണ്ടാം മത്സരത്തില് അദ്ദേഹം മാത്രമാണ് പൊരുതിയത്. ഹര്ഷിത് റാണ (10 പന്തില് 21), ശിവം ദുബെ (16 പന്തില് 20), അക്സര് പട്ടേല് (18 പന്തില് 14) എന്നിവരാണ് ഇന്ത്യയുടെ മറ്റു പ്രധാന സ്കോറര്മാര്. ഓപ്പണര്മാരായ അഭിഷേക് ശര്മയും സഞ്ജു സാംസണും നേരിട്ട ആദ്യ പന്തുകളില് തന്നെ പുറത്തായതോടെ പ്രതിരോധത്തിലായ ഇന്ത്യയ്ക്ക് മത്സരത്തില് തിരിച്ചുവരവ് സാധ്യമായില്ല. ഇവിടെത്തന്നെ ഇന്ത്യ പ്രതിരോധത്തിലായിരുന്നു.
ആദ്യ ആറോവറുകളില് 41 റണ്സെടുത്ത ഇന്ത്യയ്ക്ക് നാലു വിക്കറ്റുകള് നഷ്ടമായിരുന്നു. ഇതും ഇന്ത്യയെ തോല്വിയിലേക്ക് നയിച്ചു. ആദ്യം ബാറ്റു ചെയ്ത അയര്ലന്ഡ് നിശ്ചിത 20 ഓവറില് എട്ടു വിക്കറ്റ് നഷ്ടത്തിലാണ് 154 റണ്സെടുത്തത്. മൂന്നു വിക്കറ്റ് വീഴ്ത്തിയ അരങ്ങേറ്റക്കാരന് പ്രിന്സ് യാദവ്, രണ്ടു വീതം വിക്കറ്റ് വീഴ്ത്തിയ അര്ഷ്ദീപ് സിങ്, ശിവം ദുബെ, ഒരു വിക്കറ്റെടുത്ത ഹര്ഷിത് റാണ എന്നിവരാണ് അയര്ലന്ഡിനെ താരതമ്യേന ചെറിയ സ്കോറിലൊതുക്കിയത്. അര്ധസെഞ്ചറി നേടിയ ഹാരി ടെക്ടര് (47 പന്തില് 53) ആണ് അയര്ലന്ഡിന്റെ ടോപ് സ്കോറര്. ബെഞ്ചമിന് കാലിറ്റ്സ് 23 പന്തില് 37 റണ്സെടുത്തു. ഇന്ത്യയെ സംബന്ധിച്ചിടത്തോളം ചെറിയ സ്കോറായിരുന്നു അത്. എന്നാല്, ടോപ് ഓര്ഡര് ബാറ്റര്മാരുള്പ്പടെ നിരാശപ്പെടുത്തിയത് തിരിച്ചടിയായി.
ഇനി ഇംഗ്ലണ്ടിനെതിരെയാണ് ഇന്ത്യയുടെ അടുത്ത ടി20 ക്രിക്കറ്റ് പരമ്പര. അതില് ഇന്ത്യക്ക് വിജയിക്കാനാകുമോ എന്നാണ് ക്രിക്കറ്റ് പ്രേമികളുടെ ആശങ്ക. വൈഭവ് സൂര്യവംശിയെ അയര്ലന്ഡിനെതിരെ കളിക്കാനിറക്കാത്തത് വലിയ വിമര്ശനത്തിനിടയാക്കുന്നുണ്ട്. അടുത്ത പരമ്പരയില് വൈഭവ് അരങ്ങേറ്റം കുറിക്കുമോ എന്നാണ് ഇനി കാത്തിരിക്കുന്നത്.
content highlights: India analyzes reasons behind historic defeat; Celebrations erupt in Ireland